Првиот дел беше само почеток – една мала селекција од книгите што ми ја обоија во пошарено и позабавно 2021 година. Но, вистината е дека тешко можев да застанам само на нив 3, бидејќи имаше уште неколку наслови што упорно ми се враќаат во мислите, дури и сега, години подоцна. Тоа се оние книги што не ги памтиш само по наслов или по автор, туку по чувството што ти го оставиле – дали тоа било возбуда, инспирација или некоја неочекувана лекција што си ја понел со себе.
Овие три што следат се токму такви: доволно различни меѓусебно, ама секоја на свој начин остави трага во моето сеќавање. Некои ми беа друштво во моменти кога ми требаше бегство, некои ме натераа да гледам подлабоко, а имаше и такви што ми предизвикуваат насмевка секогаш кога ќе се сетам на нив. Па затоа, решив да не ги оставам во сенка – вреди да ви ги предложам и да бидат можеби Вашето следно четиво:
Намести си го креветот – Вилијам Х. Мекрејвен
Оваа книга ја прочитав во еден здив. Можеби затоа што е кратка, а можеби затоа што едноставно ми „легна“ во моментот кога ми требаше нешто што не е комплицирано, туку нуди мали, јасни чекори. Мекрејвен, како адмирал и човек што го поминал најтешкото можно воено искушение, воопшто не се труди да звучи како голем гуру, туку раскажува едноставно: почни од најбаналното – намести си го креветот. И навистина, таа мала работа наутро дава чувство дека барем нешто си завршил како што треба.
Ми се допадна што во книгата нема многу филозофија, туку вистински приказни – некои тешки, некои инспиративни – од кои лесно можеш да извлечеш поука. Понекогаш ми звучеше како да разговарам со постар, построг, но добронамерен човек што сака да ти каже: „Ајде, можеш ти повеќе од ова, само стегни заби и тргни напред“. И тоа, искрено, е порака што сите повремено сакаме да ја слушнеме.
Намести си го креветот – Вилијам Х. Мекрејвен, моја оценка 7/10
Напред! – Хауард Шулц
Оваа книга ја читав со мешавина од љубопитност и восхит. Од една страна, тоа е приказна за една огромна компанија, а од друга – исклучително човечка исповед за лидерство. Најмногу ме погоди фактот што Шулц воопшто не се крие зад големи зборови и бројки, туку раскажува колку било тешко да се врати во компанија што изгледала како да пропаѓа, и повторно да ја постави на нозе без да ја изгуби нејзината душа.
Oваа книга ми беше потсетник дека лидерството не е само во визијата и стратегијата, туку и во храброста да се признае кога нешто не оди добро, па и во упорноста да се вратиш на основите. Приказната за тоа како сите продавници на „Старбакс“ затвориле за да научат баристите повторно да прават совршено еспресо, ми беше посебно симболична – како порака дека понекогаш решението не е во нови трикови, туку во враќање кон она што прво те направило успешен.
Книгата е инспиративна не само ако сакаш да градиш бизнис, туку и ако едноставно ти треба мотивација дека и во најголемите кризи може да се најде пат напред – со чесност, верба и многу работа.
“Напред!” – Хауард Шулц, моја оценка 100/10
