Бараш книги што ќе го задржат твоето внимание? Ајде да пробам да ти помогнам со предлози, на дел од книгите што ги прочитав во 2021-та година. Дел од нив навистина ми останаа во мисла, од дел од нив навистина многу научив, ама имаше и такви кои едвај чекав да ги завршам, па потскокнував и по неколку реда или страни. Не мора да значи дека нашите вкусови ќе се совпаднат кога е читањето во прашање, но може да ти дадам супер препораки за тоа што да читнеш или што да подариш/ препорачаш некому.
Мајки Блогерки – Холи Вејнрајт
Три сосема различни мајки од интернет просторот. Многу проблеми, многу сплетки и 3 различни начини за справување со истите. Секоја уникатна на свој начин, слични едни на други, но сепак толку различни. И едно прашање: до каде е спремна една блогерка да оди, во име на славата и популарноста? Не секој е спремен да се носи со светот на интернетот, но паричната награда звучи толку примамливо, што некогаш можеби и ќе ве изненадат туѓите постапки.
Мајки Блогерки – Холи Вејнрајт, мојата оцена: 5/10
Разговори со Бога – Нил Доналд Волш
Замисли да може на Бог да му ги поставиш најмистериозните прашања и претпостави дека Бог ти дал разбирливи и јасни одговори. Цел еден долг разговор за сите нешта што го мачат еден човек и одговорите на истите. Книгата е наменета да ја заскокотка твојата љубопитност, во смисла да почнеш да размислушав во подлабоки и помистериозни правци. Пред да ја читам истата наидов на многу спротивставени мислења за оваа книга (можеби и баш тоа ме натера да ја земам во раце). Книгата дава одговори на прашањата што сите ние си ги поставуваме: за животот и љубовта, доброто и злото, вината и гревот, простувањето и спасението, рајот и пеколот… Отворено зборува за моќта, парите, сексот, деcата, бракот, разводот, здравјето, животното дело, иднината, минатото, сегашноста…
Разговори со Бога – Нил Доналд Волш, мојата оценa: 7/10
Герила Маркетинг – Џеј Конрад Левинсон
Герила маркетинг е книга што направи целосна револуција во маркетингот. Ниту ќе излажам, ниту ќе ја надувам како балон мојата наклонетост и благодарност кон оваа книга ако речам дека е можеби и едно од најдобрите дела во областа на маркетингот што (досега) сум го прочитала, а читам на тема маркетинг и повеќе одколку што може да замислите. Ова е книга која секој кој се занимава со бизнис треба да ја прочита, книга која ќе ви ги отвори очите, ќе ви ги прошири видиците и ќе го разбистри вашето размислување во светот на продажбата. Одлична книга! Книгата е прв пат објавена во 1983тата година па може да очекувате и некој постари начини за профит, но дефинитивно завршувајќи ја ќе станете потполно нов човек во светот на бизниост и продажбата.
Герила Маркетинг – Џеј Конрад Левинсон, моја оцена: 10/10
