Со менувањето на сезоната, доаѓа и моментот да ја смениме гардеробата – од летна во есенска. При сортирањето на алиштата, секогаш имам јасни критериуми: она што не сум го носела подолго време (повеќе од 2 години) оди во категорија на „втор живот“. Секогаш постои причина зошто не сум ги облекла – тесни се, не ми стојат убаво, не ме претставуваат веќе.
Овој процес не е само за ослободување простор, туку и за да им се даде шанса на тие алишта да донесат радост и корист на некој друг.
Што не се подарува?
Важно е претходно да се одреди која облека веќе не ни служи. Иако нема формално правило, има категории кои не се погодни за донирање: долна облека, чорапи, обувки (поради различното ниво на удобност и облик на нозете), хулахопки, костими за капење или премногу изветвена облека.
Објаснување: Причината е едноставна – не се практични за донирање и можат да предизвикаат непријатност или непотребни проблеми кај примателот. Подарувањето треба да носи радост, а не компликации.
Прво правило: квалитет и состојба на облеката
Секогаш, облеката која ја подаруваш треба да биде исчистена, без флеки, во одлична состојба и убаво да мириса.
Објаснување: Со тоа покажуваш почит кон примателот и кон самата облека. Облеката која е неуредна или валкана, иако не ти служи повеќе, испраќа сигнал дека „не вреди“, а тоа ja намалува радоста и практичната корист на нејзината вредност. Плус е страшно некултурно!
Второ правило: прашај пред да подариш
Прашај нежно и крајно внимателно дали личноста која ја имаш на ум, би сакала да ја земе облеката. Не секој го цени истиот стил, големина или боја, а некои луѓе не сакаат веќе носена облека. Ако одбие, не се навредувај – тоа е во ред.
Објаснување: Ова е прашање на уважување и почит кон изборот на другата личност. Подарувањето не смее да биде наметнато, туку да биде љубезен и свесен гест.
Пакување
Облеката секогаш треба да биде убаво спакувана. Не е важно дали користиш ќеси, кутии или хартија – важно е да изгледа внимателно спакувано.
Објаснување: Дури и кога се разделуваш со нешто што повеќе не ти служи, тоа заслужува почит. Добро спакувана облека за подарување создава чувство на внимание и љубезност кај другата личност, а не дека едвај си чекала да се ослободиш од нешто.
Доставување на облеката
Фер е да се понудиш да ја однесеш облеката лично до примателот. Ти си таа што предложи да подариш, па е во ред да ја предадеш со внимание.
Објаснување: Личното предавање носи топлина и почит – го прави чинот на подарување поинтимен и пријатен за обете страни.
Зошто е добро да подаруваш облека?
Подарувањето на облека е начин да се ослободи простор, да се даде втор живот на парчињата што не се носат, а истовремено да се направи добрина за некој друг. Тоа е свесен, еколошки и хуман гест кој ги спојува практичното со доброто чувство. Тоа не значи дека на другиот крајно му треба или е зависен од твојот подарок. Тоа значи дека облеката е доволно сочувана да живее втор живот кај друга личност и дека доволно ја ценам личноста на кој а и давам дел од она кое со љубов и радост сум си го купила себеси, но вреето, килажата, условите и себеперцепцијата е сосема во ред да се промени од година на година. Тоа не значи дека совршено сочувана облека треба да заврши во канта.
Што е нефер однос при подарување
Не е фер да диктираш кој мора да носи облека или што се прави со неа потоа. Исто така, важно е да разграничиш:
-
Подаруваш: облеката е за примателот, не се очекува враќање, ниту се поставува правила, што со облеката откако ќе ја предадеш.
-
Позајмуваш: очекуваш да биде вратена. И го потенцираш истото на самиот почеток!
Објаснување: Ако се подарува, твојата работа завршува со чинот на примопредавање!
Не е фер да наметнуваш услови или очекувања по предавањето. Разграничи јасно сама со себе дали подаруваш или позајмуваш.
